அதனது அதனதில்

இருவருக்குமான மேஜையில்
பாதிப் பருகிய பழச்சாறின் நுரை
கோப்பையின் உள்ளே வடிகிறது

குறைந்த வெளிச்சத்திற்குப் 
பழகிய கண்களில் நீ
மங்கலாகத் தெரிகிறாய்

கண்ணாடியில் பார்த்துவிட்டு
பொருந்தவில்லையென
போனது போலவே வருகிறாய்

கேள்வியற்ற உதட்டிற்கு
தாளிடவில்லையென
விரல் கோர்த்தாய்

நியாயப்படுத்துதலின் நியாயங்களை
காலம்
எளிதில் அனுமதிப்பதில்லையென

சமாதானம் சொல்லிக் கொண்ட பின்
குரல் கேட்கப் பயமாய் இருக்கிறதென
அழைக்க மறுத்தாய் அதே பிடிவாதத்தோடு