குற்றவுணர்ச்சி ஒன்று மிச்சமிருக்கிறது

இரு நாட்டிற்கிடையேயான எல்லைக்கோடு
வீட்டிற்குள்ளிருந்து
சாலையை கடக்கும் புகைப்படத்தை
வெகுவாக சிலாகிக்கிறாய்

முதுகைத் தட்டிக்கொடு
அல்லது தொடு என
வழியனுப்பும் போதெல்லாம்
ரேகைகள் படர்வதற்குத் திட்டுவாய்

பரவாயில்லை
இன்றையப் பேச்சை நீட்டிக்க
உனக்கொரு செய்தி கிடைத்திருக்கிறது என்றேன்

மெளனத்தில் ஊடாடும் நினைவுகளை
உனக்கும் சேர்த்து யோசிக்கிறேன்

சொல்லிக்காட்டுவதில்
என்ன நிகழ்ந்துவிடப் போகிறது

அழைப்பு ஒன்று காவல் இருக்கிறது
பிடி கொடுக்காமல்