பகலிடமிருந்து அறுபடும் இரவு

உனக்கு இரவை அறிமுகப்படுத்த
தேவையில்லாதிருந்தது

ஒரு கட்டத்திற்குப் பிறகு
மின்விசிறி ஓடும் சத்தம் கூட
இரைச்சலாகிப் போனது

செருப்பில்லாமல் நடந்த வரப்பில்
புற்கள் பாதம் அளைந்ததை
அதே கூச்சத்தோடு சொல்லிக்கொண்டிருந்தாய்

உச் கொட்டியதை
முத்தமில்லையென நிரூபிக்க
அதிக நிமிடங்கள் பிடிக்கவில்லை

யார் முந்திக்கொண்டதென்ற
யோசனை தேவையற்றிருக்கிறது

பச்சை வட்டத்தில்
வலப்பக்கம் நோக்கி நிற்கும்
வெள்ளைநிற முக்கோணம்
அழுத்தப்படாமல் விட்டிருப்பதின்
சூட்சமம் தான் புரிந்தபாடில்லை

மிருதுவாய் அறுபடுகிறது
பகலிடமிருந்து இரவு