உன்னிடம் சொல்வதற்கு ஒன்று இருக்கிறது

கணுக்கால்வரை அனுமதிக்கும் அலையில்
கரையொதுங்கிய வலைத்துண்டு
காலில் சுற்றிக்கிடந்ததை
பதற்றம் குறையாமல் சொல்லிக்கொண்டிருந்தாய்

நகத்துண்டுகள் பற்களில் பிடிபடாதிருக்க
நீ தேர்ந்தெடுத்த நகப்பூச்சு நிறம்
கண்மூடி முத்தமிடும் வெளிச்சம் கொண்டது

நிழலை அடையாளம் காணும் சூட்டினை
பந்தெனெ உருட்டி
நாசியில் வைத்து விளையாடுகிறாய்

கொலுசின் இடைவெளியில்
பெருவிரல் நுழைக்காதே
உன்னிடம் சொல்வதற்கு ஒன்று இருக்கிறது