உரிமம் இல்லா உடலிலிருந்து...

காத்திருப்பதில் உடன்பாடில்லை
நீண்ட பெருமூச்சில் அதன் தளர்வு தெரிவதனால்
நினைத்திருக்க முடிவுசெய்திருக்கிறேன்

அடர்ந்த சாலையில் பொழிந்த மழையில்
பீறிட்டு மிளிரும் விளக்கு வெளிச்சத்தில்
குடையினை மிஞ்சிய சாரலில்
நனைந்த படி அதனை ரசிக்க வேண்டும்

தூரத்தில் ஊளையிடும் தெரு நாயின்
குரலொன்று கேட்டபடி மீதம் யாவும்
மயான அமைதி கொண்டிருக்க வேண்டும்

சாலையில் விரைந்தோடும்
மழை நீரின் இரைச்சல்கள்
சரசரவென காதுகளை துளைக்க வேண்டும்

பச்சை வாடை உதிர்த்து
எரியும் விறகுகளின் ஊடே
சடலம் அமைதியாய் உறங்கட்டும்

வேறொரு உருவில் வேறொரு உடலில்
வேறொரு கனவில் உலவ காத்திருக்கிறேன்
நினைத்திருப்பதிலும் உடன் பாடில்லை...