நான் மூங்கில் பேசுகிறேன்

உடலை பாளமாக கிழித்து
அதில் பாடை செய்து
இறுதி ஊர்வலம் நடத்துகிறீர்களாம்
கேள்வியுற்றேன்

குழந்தை ஒன்றின் கையில் கொடுத்து
அந்தரத்தில் கயிற்றில்
ஆட சொல்கிறார்களாம்
அதையும் கேள்வியுற்றேன்

இளம் பிராயத்தில் வெட்டி சென்று
சுபதினங்களில் பந்தக்காலிட்டு
கொண்டாடுகிறீர்கள்
என்பதையும் கேள்வியுற்றேன்

இசை தட்டுகளில்
குரலடைத்து விற்பனை செய்வதும்
மெய் மறந்து ரசிப்பதையும்
கேள்வியுற்றேன்

வீதியில் வாசித்து
ரூபாய் பத்தென
இசையினை விற்பவனை
போலி எனவும் வணிகமெனவும்
அவமதிப்பதையும் கேள்வியுற்றேன்

தணலொன்று விழுந்து
அதிலெழுந்த என் அழுகுரலினை
தொலைக்காட்சியில் கண்டு உச்சி கொட்டி
கடந்து செல்கிறீர்களாம் கேள்வியுற்றேன்!
வாழு வாழ விடு வாழ வை!