பால்யம் விழுங்கிய கான்கரீட்

சிறுவர்களின் கூச்சல்கள் நிறைந்த
அந்தத்தெருவில்
புழுதிகள் தீர்மானித்துக்கொண்டிருந்தது

ஒவ்வொருவருக்குமான
கொண்டாட்டத்தையும்
மன,உடல் வலிமையையும்

விரல் அச்சுகள் பதிந்த
சட்டையின் பதைபதைப்பு
ஒரு இரவில் தொலைந்து போக,

எல்லா மாலை வேளையும்
விடுமுறை பொழுதுகளிலும்
மண் தரைகள் தேடித்திரிகின்றன

கான்கிரீட் மூடிய
அச்சிறுவர்களின் சந்தோசத்தையும்
பாதத்தடங்களையும்..