இயந்திர உலகம்

வீதி இறங்கும்முன்
கடைசியாய் ஒருமுறை
உடை சரி செய்துகொள்கிறாள்
விடுதி மாணவி ஒருத்தி

இசையால் மூடிய
இரு காதுகளை ஒட்டிக் கசிந்த
வியர்வையினை
கைக்குட்டையில் உறிஞ்சியபடி

சாலையில் விரைந்தோடும்
வாகனங்களை கை மறித்து
விறுவிறுவென
கைப்பை பற்றி கடக்கிறாள்

சிலநேரக் காத்திருப்பில்
கைவிட்டு கைமாறும்
அலைபேசியும் கைக்குட்டையும்
வாய்விட்டு கத்தமுடியாத பொறுமை

நெரிசல் மிகுந்த பேருந்தில்
முகம் சுளித்து முன்னேறுகிறாள்
அலுவலகம் செல்லும் முன்
ஆறு மாத குழந்தைக்கு பாலூட்ட!