முடிவிலொரு தொடக்கம்

சிநேகமாய் இருந்த பொழுதுகளை
அசைபோட்டபடி
கடிதமொன்றை வரையத்துவங்குகிறாள்

அதன் நீட்சியானது
அவனில்லா ஏக்கத்தினை
வெளிக்காட்டிடாதிருக்க போராடுகிறாள்

ஒவ்வொரு பத்திக்குமான இடைவெளியில்
நிகழும் மீள் வாசிப்பில்
அக்காகிதத்தினை கிழித்தெறிகிறாள்

சொல்லத்துடித்திடும் பேராவலை தனக்குத்தானே
வைத்துக்கொள்ளவும் விரும்பாதவள்
தன் காதலை சொல்லிவிட விரும்புகிறாள்

உதட்டுச் சாயம் பூசுவதை
கணவனுக்காக விட்டிருந்தவள்
வெற்று காகிதம் முழுவதும்

இதழ்கரை பதித்து மின்னஞ்சல் ஏற்றுகிறாள்
பிரிவதாயிருந்த கணவனின்
கடிதமொன்று பதிவிறக்கம் செய்தபடி!