தன்னை தொலைத்தல்

விரல்கள் நடுங்கியபடியே
சிகரெட் ஒன்றினை பற்றவைத்தாள்
உதடுகள் இணையா அளவிற்கு
வாய் எதையோ உளறிக் கொண்டிருந்தது

எவ்விருக்கையும் அவளுக்கு
ஆசுவாசமாய் இல்லையோ என்னவோ
சுவர் சாய்ந்து தரையிலமர்ந்திருந்தாள்

பொலிவிழந்த முகம்
சிக்குண்ட கூந்தல்
கசங்கிய உடை

மேசையில் தவறிய மதுக்கோப்பை
சில்லுகளை பொறுக்கி
தரையெங்கும் இரத்தச் சுவடாக்கியிருந்தவள்

புகைக்காமல் கரைந்து போன
சிகெரெட் சுடு சாம்பலை
மணிக்கட்டில் அறுத்து தட்டிக் கொண்டிருந்தாள்!