நிச்சயிக்கப்பட்ட நாள்

நேரமும் நாளும் முன்னமே
நிர்ணயிக்கப்பட்டிருந்தது
அதுவே கடைசி சந்திப்பென

இடைவேளைக் காலங்களில்
நிரம்ப மறுத்த கோப்பைகள்
இடைவிடாது வழிந்து கொண்டிருக்கின்றன

பருகுவதற்கு வாயற்றுக் கிடக்கும்
கன்னங்களிரண்டிலும் ஒளிந்து கிடக்கிறது
கரைந்த கருவிழிக்கொத்துக்களிரண்டு

இரவின் அடர்த்தியில் பசைகளற்ற
உதட்டின் வெடிப்புகளில்
நடனமாடுகின்றன நினைவுக்காந்தல்

கனவுகளுடைத்த காலத்தின் வாசலில்
முத்தமிட்டு வரவேற்க
ஈரமின்றி முறுக்கேறுகிறது கயிறு!