தூங்குவதுபோல தூங்குகிறாய்

பாதம் அடிபட்ட குழந்தையின்
முகபாவனையையும் கை செய்கையையும்
ஒத்திருக்கிறது சண்டைக்குப்பின் உன் முகம்

கோபத்தில் கடித்துக்கசியும் குருதியில்
உதட்டின் உட்தசை நிறமிழந்து
வன்மமாய் உருவேறுகிறது காதல்

மணல் வெடிப்புகளில் வேகமாய்
பாயும் நீரினைப்போல பிடிவாதங்களால்
நரம்புகளில் நிரம்புகிறாய்

தழுவுதலில் பெற்றிடும்
முத்தத்தத்தின் விளக்கவுரைகள்
உன் மூடிய விழிகளுக்குள் இருக்க

வாதையினால் உலர்திராட்சை உண்ணும்
ஓய்வு நாளின் பின்மதியபொழுதில்
வாசிக்கத்துவங்குகிறேன்-நீ

தூங்குவதுபோல தூங்குகிறாய்!