தான் தான் எனும் நான்

பிறகொருமுறை
அதிசயமாய் அழைத்திருக்கிறாயென
வினவவும் "தோணிச்சி" என்றவன்
சட்டென தொலைபேசியைத் துண்டித்தான்

மன்னிப்பு கேட்க அழைத்திருப்பனோ
திட்டுவதற்கு அழைத்திருப்பனோ
நிச்சயக்கப்பட்டிருக்குமாவென-பட்டியல்
நீண்டது இருவருக்குமான இடைவெளிவரை

தொடர்பு எண்ணை அழித்துவிட்டதாய் சொன்னவன்
எப்படி அழைத்தான்?
நானும் அழைத்துவிட்டதாய் சொன்னது நினைவில்வர
யூகிக்கும் போக்கு கடிவாளமிழந்தது

பின்பு
திருப்பி அழைத்திட வசதியிருந்தும்
மனதிற்கும் அறிவிற்குமான போராட்டத்தில்
இருவருமே வென்றோம்

அவனும் அழைக்கவில்லை
நானும் அழைக்கவில்லை