கீறலிடப்பட்ட இதயம்

பேருந்தின் பின்னிருக்கையில்
சொற்குவியலுக்கு நடுவே
லாவகமாய் தீட்டப்பட்டிருந்தது இதயம்

அதன் நெளிவுகளை உள்ளடக்கிய

வடிவமைப்பில்
எந்தவொரு கீறலும் இல்லாமலிருந்தது

கத்தியின் துணையால்
நிகழ்ந்திருக்கும் காதல் வரைவும்
ஒருசேர்ந்த தடித்த கோடும் வியப்பு

மேடு பள்ளங்கள், திடிர் நிறுத்தம்
இறங்க வேண்டிய இடம், கூட்ட நெரிசல்
நடத்துனரின் கண் தப்புதலென

ஒரு மெனக்கெடலின் தீவிரத்தை
அதீதக் காதலை தன்னை மறத்தலை
காயத்தை வெளிப்படுத்த போராடியிருக்கலாம்

அல்லது
அதன் கிழிப்புகள் நேற்றைய கொலையின்
ஒத்திகையாகக்கூட இருக்கலாம்!