உன் வாசனை

உன் அனுமதிக்காக காத்திருக்கும்
விழி நீரை உடைத்துவிட மெளனமோ
பெரும்சத்தமோ போதுமானதாகயிருக்கிறது

வருகையை எதிர் நோக்கியிருக்கும்

என் பேராவல்களை-நீ
கண்டுகொள்வதில்லையென அறிந்தும்,

மகள் வயிற்றுப் பிள்ளையின் முத்தத்திற்கு
கன்னம் திருப்பி காத்திருக்கும்
பாட்டியின் எதிர்பார்ப்பு போன்றது அது

கிறுக்கலுக்குத்துணியும் வேளையில்
பெயரெழுதி விளையாடும் கடற்கரையின்
பிசுபிசுப்பு ஞாபகத்தையும் அப்பிவிடுகிறது

எதிர் இருக்கையில் யாரும் வேண்டாமென
தீர்மானித்து ஒதுங்கும் தேநீர் கடையில்
நாசி துளைக்கிறது உன் வாசனை!