அக்காவும் தம்பியும்

தானும் பூப்பறிக்க வருவதாய்
அடம்பிடித்த தம்பியை
இடுப்பிலெடுத்துக்கொண்டாள் அக்கா

தட்டான்களுக்கும்

கள்ளிப்பூக்களுக்கும் அதன் பழங்களுக்கும்
மசியாத தம்பி அழுதுகொண்டேயிருந்தான்

ஆட்டுக்குட்டியின் முதுகிலமர்த்தி
கூட்டிப்போக
ரோமங்கள் உரசி மீண்டும் அழத்துவங்கினான்

தரையிறக்கி நடந்துவாவென்றால்
முள்குத்துமென
பிடிவாதம் பிடித்தான் தம்பி

ஒவ்வொரு மடியாய் பறித்துப்போட்ட
மல்லிப்பூவினை
பிய்த்து விளையாடத்துவங்கினான் தம்பி

தோட்டக்காரனின் அடிக்கும்
அன்றைய கூலியின் இழப்புக்கும் பயந்து
தேம்பி தேம்பி அழத்துவங்கினாள் அக்கா!