கோப்புகளுக்குள் தேங்கிய துளிகள்

இரவெல்லாம் விரவிக்கிடக்கும்
பனிக்காற்றில் அவளின்
மூச்சுக்காற்று அதற்கு எதிர்பதம்

அறையெங்கும் பரவிய நினைவு விளக்கில்

தேகம் ஒட்டிய ஆடைகள்
இடைஞ்சல்களாகவும் இம்சைகளாகவும்

ததும்பும் கோப்பையின் நீரானது
தொண்டைவழி வழியாமல்
குடிப்பதற்கு பாவனை செய்கிறாள்

மேலும் கீழுமாய் போய்வரும்
தலையசைப்போடு அங்குமிங்குமாய்
பார்த்துப் பார்த்து விசும்புகிறாள்

தலையணை ஏந்திய தலையிடையே
கைமடித்து சுவற்றினில்
துவாரமிடுகிறாள் காது வழியே

எப்போதும் போல குறட்டையொலியெழ
புகைப்பட கோப்புகளை கையிலேந்தி
அழத்துவங்குகிறாள்!