ஒற்றைக்கால் சிறுமி

சிலுவைகள் விதைக்கப்பட்டிருந்த
நிலத்தில் உலவிக்கொண்டிருந்தாள்
மெழுகுவர்த்தியுடன் ஒற்றைக்கால் சிறுமி

பெயர்களுடனான பிறப்பு இறப்பு குறிப்புகளை
எட்டாய் மடிக்கப்பட்டிருந்த
காகிதத்தோடு ஒப்பிட்டுக்கொண்டிருந்தாள்

குறிப்புகள் யாவும் பொருந்திப்போனதில்
சருகுகளின் இசையோடு மெளனம் ஊற்ற
காலத்தின் வழியெங்கும் பூத்திருந்தன காளான்கள்

அதே பெயரில்
அதே பிறப்பில்
அதே இறப்பில்
மீண்டுமொரு கல்லறை காண்கையில்
அவளுக்கு நரைத்திருந்தது!