அடையாளங்கள் தொலைந்தது

அடையாளங்கள் தொலைப்பது பற்றி
வெகு நேரமாய் நிலவற்ற இரவில்
விவாதித்துக்கொண்டிருந்தாள்...

கையிலிருக்கும் லைட்டரை
பற்றவைத்தும் அணைத்தும்
கண் பார்க்காமல் பேசிக்கொண்டிருந்தாள்

தன் கைப்பையிலிருக்கும்
டிக்கெட் குவியல்களை கொளுத்துவதுபோல
கொளுத்தாமல் விளையாடிக் கொண்டிருந்தாள்

தனக்குப் பிடித்தவைகள் பிடிக்காதவைகளென
நீளும் பட்டியலில் இறுதியாய்
"ம்ம்ம் அப்புறம் நீ" என்று முடித்து வைத்தாள்

ஒரு வழிப்போக்கனின் புன்னகையை
ஏற்றுக்கொண்டவளாய் அவன் போகும்வரை
பார்வையை செலுத்திக்கொண்டிருந்தாள்

அவனைத்தெரியுமா என்ற வினாவில்
தெரிந்து என்ன செய்யப்போகிறாய் என்றாள்
டிக்கெட் எரிந்து கொண்டிருந்தது!