இலையுதிர் காலம்

என் மீதான உங்கள் நம்பிக்கைக்கும்
என் மீதான என் நம்பிக்கைக்கும்
இடைவெளி அதிகமாகவே இருக்கிறது

என் சுயம் பற்றிய உங்களின்
கருத்துக்கணிப்பும் பழக்கங்களும்
தோல்வியுற செய்கிறது காலம்

நான் என்றொரு பிம்பத்தை
என் பங்கிற்கு நானும் காலமும்
தோதுவாய் மாற்றிக்கொண்டிருக்க

குற்றவாளியாகவும் குற்றவாளியாக்கியும்
ஆதங்கத்தையும் அனுதாபத்தையும்
என் மீது பதிவு செய்து கொண்டிருக்கிறீர்கள்

சிறுமியொருத்தி சேகரிக்கும்
உண்டியல் காசுபோல ஏதுமறியாது
உங்கள் கடமையை செய்துகொண்டிருக்கிறீர்கள்

ஒரு துக்கத்தை அதன் போக்கில் சென்று
கவிதையாக்கிக்கொள்ளும் சுயநலக்காரன்
நான் என்பது அறியாமல்!