தனிமை தேடி துணை வேண்டுபவன்

அழுவதற்கு ஆயத்தமாய்
தானுமற்ற இடமொன்றைத் தேடி
இருளில் மூழ்குவதென முடிவெடுத்தவன்

சன்னல்களற்ற அறை
காற்றுபுகமுடியாதொரு அடைப்பு
இடுக்குகளில்லா கதவினை கண்டான்

கண்ணீரின் பிசுபிசுப்பினை துடைக்க
அப்பா உடுத்திய லுங்கியொன்றோடு
தாழிடப்பட்டது அறை

அழுவதற்கான காரணங்கள் யாவும்
யாருக்கென யாரலென குமைந்து
மூச்சினை அடைத்திருந்தது சிந்தனை

நிசப்தங்கள் ஆழும் அந்த அறையும்
அதன் சூழலும் கதறல்களை
கவனமாய் உள்வாங்கிக்கொண்டிருந்தன

அவனோ
தன்னைத் தேடுவதற்கு கூட
யாருமில்லையென மீண்டும் அழத்துவங்கினான்