அவள் அப்படித்தான்

விவாதம் விரும்பாதவளாய்
பதிலேதும் கைவசம் இல்லாதவளாய்
பொய்பேச மறுப்பவளாய் இருக்கிறாள்

பிடிவாதக்காரியென திமிரானவளென
குற்றம் சுமத்தமுடியாதொரு
பாவனை முகத்தில் பதித்திருக்கிறாள்

மரம் கொத்தியின் பார்வையென
குவித்தும் பரப்பியும் எதிரிலிருந்தே
புரியாதொரு சைகை செய்கிறாள்

முதல் புன்னகையோ முதல் நிராகரிப்போ
எதுவும் வாய்க்காத முதல் சந்திப்பினை
நினைவு கூர்ந்து கைகுலுக்க எத்தனிக்கிறேன்

நழுவுதல் போன்ற சமிக்ஞையோடு
உங்களுக்கு இப்படித்தோன்றுவதில்
தவறில்லையென விடைபெறுகிறாள்!