கேள்விகள் கேட்கப்படுகின்றன

எல்லா பாதையிலும் எவனோ ஒருவன்
கை நீட்டி பேசிக்கொண்டிருக்கிறான்
ஒருவன் வழிமறித்து கேட்கிறான்

சுட்டிக்காட்டுவதாகட்டும் கேள்வியாகட்டும்
பிழையாகட்டும் விமர்சனமாகட்டும்
எளிதில் யோசிக்கவைத்துவிடுகிறார்கள்

அவசர நடையோ சிந்தனைமுகமோ
கேட்பதென தீர்மானித்தபின் அவர்களின்
கேள்விகள் கேட்கப்படாமலிருப்பதில்லை

கேட்பவர் யாரென அறியாதிருந்தும்
கேட்பது இன்னதென அறியாதிருந்தும்
பதிலோ புன்னகையோ பிறந்துவிடுகின்றன

தப்பித்தலுக்காக நாம் இடைச்செருகும்
பதிலோ புன்னகையோ ஒப்புக்கானதென
அவர்களும் அறியாமலில்லை!