முத்தத்தில் என்னயிருக்கிறது

சோழியுறுட்ட துவங்கியிருக்கிறாள்
விழிகளாலும் விரல்களாலும்
என் வீட்டுத் திண்ணையில்

கட்டம் கட்டமாக நகரும்

வலையோசையும் சிணுங்கல்களும்
அவளின் உடைந்த வளையல்களும்

என் கோட்டையை கடக்க நேருகையில்
திருவிழாக்கால கோபுரமாகிறது
வளையல்களின் குவியல்கள்

வெட்டுப்பட்டு வெளியேறுகையில்
பற்களுக்கு கடிக்க கொடுக்கும்
கீழுதட்டில் தொக்கி நிற்கும் மீண்டுமொரு தாயம்

விளையாடுவதில் சோர்ந்தவளாய்
பக்கவாட்டில் கால்நீட்டி மடக்கையில்
வந்து போகும் கொலுசும் நெட்டிமுறிப்பும்

அள்ளி முடியும் கூந்தலும்
சட்டென தொடையில் கிள்ளிவைத்தலும்
ஆட்டம் கலைவதற்கான சமிக்ஞைகள்

பாதியில் கலைந்து போறவளை
பந்தயம் என்னவாயிற்று என்றால்
அப்படி அந்த முத்தத்தில் என்னயிருக்கிறது என்கிறாள்!