சுயம் தொலைத்தல்

தன் காதில் தனக்கு கேட்டிடாத அளவிற்கு
ஒர் உரையாடல் நிகழ்த்த விரும்பிய அவனுக்கு,
கண்களில் கற்பனையேதும் இல்லாதிருந்தது

மதிய வெயிலில் கீறிட்டு விழும்

சன்னல்வழி ஒளியில் விரல் நீட்டி
ஒளி ஒடித்துக்கொண்டிருக்கிறான்

எப்போதும் விரிந்து கிடக்கும்
அவனது காகிதப்படுக்கை
முதுகில் பிசுபிசுத்து அறைக்குள் நடக்கவிட்டது

எந்தப்பாடலுக்கும் செவிகொடுக்க மறுக்க
கணினிச் சீட்டாட்டத்தில்
தோற்றுக்கொண்டேயிருந்தான்

அழுவதற்கான காரணமுமின்றி
வேடிக்கைப்பார்க்க வீதியுமின்றி
அவனுள்ளிருந்து வெளியேறிய அவனை

விருப்பங்களற்ற விருப்பத்தை புகுத்த
புத்தகம் வாசிக்க அமர்த்தினால்
தலைப்பைக்கூட பார்க்க மறுக்கிறான்

துணிகள் தொங்கும் இருபக்க கயிறுகளும்,
தனிமையும் சாதகமாயிருக்க
அவனைக்கொன்றுவிடலாமென்று துணிந்தவன்

பெரிதாய் அஞ்சினான்
ஒரு பட்டப்பெயரை தவிர்க்கவிரும்பினான்-அது
வாழத் தெரியாதவன் தற்கொலை செய்துகொண்டான் என்பது!