வேண்டும் வேண்டும் -2

இணையாக துணையாக
என் கைப்பிடியிலும்
கண் பிடியிலும் வேண்டும்

என் அறையின் தாழ்ப்பாளாகவும்
என் வீட்டின் திறப்பானாகவும்
நீ வேண்டும்

தும்மலின் நெடி
நீயாக வேண்டும்
என் உயிரின் கொடி
உனதாக வேண்டும்

நெஞ்சத்தின் ஆளுமை
நீயாக வேண்டும்
வாழ்வின் மிச்சத்தை நீ
முழுமையாக்க வேண்டும்

கொஞ்சத்தின் கொஞ்சமே
கோபமுற வேண்டும் அதுவும்
மஞ்சத்தில் தீர்ந்து போக வேண்டும்

தூக்கம் கலைதலும்
நீயாக வேண்டும்
துயில் நிகழ்வதும்
உன்னால் ஆக வேண்டும்

பெரும் சோகத்தில்
காமுற வேண்டும்
கடும் கோபத்தில்
தந்தையாக வேண்டும்

கொஞ்சலில்
தாயாக வேண்டும்
கெஞ்சலில் மகள்போல்
ஒரு பார்வை வேண்டும்

பொழுது கழிவது
உன்னுடன் வேண்டும்
பொழுது புலர்வது
உன்னுடல் வேண்டும்

சமையலறை நீ
ஆள வேண்டும்
சமஞ்சகொடி எனை
நீ சூழ வேண்டும்

காத்திருத்தலில்
அம்மாவாக வேண்டும்
கண்டதும் கட்டியணைத்தலில்
மகளாக வேண்டும்

உன் மடி
என் இரண்டாம்
தொட்டிலாக வேண்டும்